* Ev danasîn ji Rojnewsê hatiye wergirtin. FK amade kiriye.
Îro salvegera koça dawî ya helbestvanê mezin Şêx Rizayê Talebanî ye.
Wî bala gelek rewşenbîr û lêkolîneran kişandiye û li ser helbestên wî gelek lêkolîn hatine kirin. Di wêjeya Kurdî de wek fêrgehek taybet ji bo helbestan hatiye hesibandin.
Şêx Rizayê Talebanî kurê Şêx Ebdulrehmanê Şêx Ehmedê Mela Mehmudê Zengene ye.
Di sala 1835an de li gundê Qirix ê ser bi navçeya Çemçemal a ser bi parêzgeha Silêmaniyê di malbatek rewşenbîr, wêjevan û zanyar de çavê xwe li dinê vedike.
Bavê wî alim, şêxek zana û helbestvan bû.
Destpêkê ber destê bavê xwe xwendiye, piştre ji bo dibistanê çûye Kerkûk, Koye û Silêmaniyê.
Di temenê 25 saliya xwe de xwendina xwe temam kiriye û bûye melayê mizgeftê.
Şêx Riza ji bilî zimanê dayîkê (Kurdî) Farisî, Tirkî û Erebî jî baş fêr bûye û wek kurdî helbest jî bi van zimanan nivîsandiye.
Di sala 1860an de çûye Helebê û ji wir derbasî Stenbolê bûye. Du salan li Stenbolê maye, piştre vegeriyaye Kerkûkê. Piştî ku bavê wî wefat kiriye, ji Kerkûkê çûye bajarê Koyeyê.
Şêx Riza di sala 1866an de çûye Erziromê. Piştre derbasî Stenbolê bûye. Di demek kurt de li wir nav û dengê wî belav bûye.
Nêzî 8 salan li Stenbolê maye. Di sala 1898an de ji Stenbolê vegeriyaye û heta rojên dawî yên jiyana xwe li Bexda û Tekye Talebanî bi cih bûye.
Helbestên Şêx Riza di du cildan de bi navê Dîwanî Şêx Riza Talebanî hatine berhevkirin û çend caran hatine çapkirin û belavkirin.
Helbestvan û wêjevanê mezin ê Kurd di 13ê Çileya sala 1910an de 75 saliya xwe li Bexdayê koça dawî kiriye û li Goristana Geylanî li nêzîkî gora Şêx Ebdulqadirê Geylanî hatiye veşartin.
Şêx Rizayê Talebanî şêwazek cuda yê nivîsandina helbest û nivîsên wêjeyî hebûye. Zimanek radîkal û vekirî bikar aniye.