Firaz Baran
Di dîroka PKKê de yek ji dirûşmeya herî zêde hatiye gotin “Berxwedan Jiyane” ye. Ev gotina endamê Komîteya Navendî ya PKKê Şehîd Mazlûm Dogan e.
Mazlûm Dogan vê dirûşmeyê li Zindana Amedê qiriya. Li zindaneke ku her deqe li girtiyan îşkence lê dihat kirin…
Ev soz di pratîkê de bi cih anî û bi berxwedana xwe bû mînak û 21ê Adar a 1982an de tevlî kerwana şehîdan bû.
Li ser vê yekê bi hezaran girtiyên ku rêgezên dewletê qebûl kiribûn li pey wî derketin û dest bi berxwedanê kirin. Berxwedan bi ser ket!
Dewletê berê digot: “Ez dikarim asîmîle bikim” û “ez dikarim wan bikim ajan.” Lê girtiyan ala berxwedanê bilind kirin û dewlet neçar ma û armanca xwe paş de hişt û girtiyan weke “girtiyên polîtîk” qebûl kir.
1981an Hatiye Çapkirin
Ev peyv di heman demê de navê pirtûka Mazlûm Dogan e. Dogan ev pîrtûk di girtîgehê de nivîsandiye…
Pirtûk a “Berxwedan Jiyane” di Nîsana 1981ê de hatiye çapkirin. Di dîroka PKKê de bûye pirtûkeke girîng a ku herî zêde ji aliyê kadro, alîgir û sempatîzanan ve hatiye xwendin.
Pirtûk di kîjan şert û mercan de hatiye nivîsandin û bi çi awayî gihandiye derve? Çîrokeke wê ya ku dê bibe mijara fîlman heye…
Çîroka pirtûkê Fîdan Yildirim dizane. Yildirim sala 1977an li Enqereyê tevlî xebatên şoreşê dibe û dawiya sala 1980yan derbasî Sûriyê dibe. Piştre bi salên dûr û dirêj xebatên rojname û weşanxaneya Serxwebûnê rêvedibe.
Çîroka Dîrokî Yildirim Vedibêje
“Ez di Cotmeha 1980 de çûm Sûriyê. Heta Gulana 1982an ez di nav xebatên qada Rojhilata Navîn de bûm. Dema ku ez li mala Rêbertî li Şamê bûm, notên hevalê Mazlûm hatin.
Dibê meha ewil a 81ê bûya. Destmalên bi kaxiz sê qat in. Hevalê Mazlûm li ser qatekî bi herfên pir biçûk nivîsandibû û bi rengekî xweşik pêçandibû. Ew rêbazek e ku mirov bikaribe wê bi hêsanî derxe derve.
Hevalek sewqî dadgehê tê kirin. Tê texmînkirin ku ew ê bê berdan û destmala bi kaxiz (selpak) têxin bêrîka kirasê wî.
Hevalê Mazlûm nêzîkatiya lêpirsîneran, rê û rêbazên êşkenceyê nivîsandibû. Dixwaze bibe pirtûkek perwerdehiyê. Di dema îşkenceyê de mirov çawa tevbigere? Rê nîşanî me dida.
Bi baldarî, bi herfên pir piçûk û bi pênûsa şîn hatibû nivîsandin. Ji bo ku destmala bi kaxiz zirarê nebîne em pir bi baldar bûn.
Wê demê min nivîsên hevalê Mazlûm di defterekê de nivîsandin. Paşê ew nivîs wek pirtûk hate amede kirin û Weşanên Serxwebûnê çapkir.
Çapa yekem di 8ê Avrêl a 1981an de derket. Ez wê demê li jêr bûm. Di hemû qadên partiyê de wekî materyalê perwerdeyê hate xwendin. Bi salên dûr û dirêj pirtûka hevalê Mezlûm di nav kadro û sempatîzanên partiyê de hate xwendin.”