* Helbestvan Bayram Balci di heman demê de rojnamevan e. 33 sal bûye ku rojname û telewîzyonên kurdî de dixebite. Îro ew edîtorê bultena çandê ya Medya Haber Tvyê ye. Emê êdî di nava hefteyê de rojane nûçeyên Kak Bayram Balci bi we re parve bikin.
Bayram Balci
Ji TEV-ÇAND Rojavayê Strana “Welat”
TEV-ÇAND Rojava straneke nû ya bi navê “Welat” çêkiriye. Stran piştgirî dide şervanên YPJ, YPG û QSDê.
Gotinên stranê Serhat Zana nivîsandiye û muzîka wê jî Varon Candemir çêkiriye. Her wiha Varon Candemir û Mufîde Hemdî jî stranê gotiye.
Di stranê de banga tevlîbûna şerê gel ê şoreşgerî tê kirin.
Stran diyarî cangoriyên azadiyê yên Kurdistanê hatiye kirin ku li bendava Tişrînê bi lehengî li dijî dewleta Tirk a dagirker li berxwe didin.
Bo stranê klîbek jî hatiye kişandin. Stran bi zaravayên kurmancî û dimilî tê gotin. Hûn dikarin li ser hesabê medyaya dijîtal a TEV-ÇANDê temaşa û guhdarî bikin.
*
Şeva “Zozanê Bavê Siltanê”
Hîndekarê dramaturjiyê û derhêner Avaşîn Yorulmaz strana “Zozanê Bavê Siltanê” adapteya sahneyê kiriye.
Lîstik dê roja 19ê Çile li Stenbolê derkeve ber temaşevanan.
Şanohêz dikarin li Navenda Çand û Hunerê ya Kadikoyê saat 19:00ê tevlî şevê bibin.
Kesên ku dixwazin estetîka dengbêjiyê biceribînin an jî li ser vê mijarê kûr bibin bila ji bîr nekin.
Ev stran behsa bûyereke dike. Ev bûyer di navbera koçerê welatê Serhedê Huseyîn Axa û Şahê Îranê de derbas bûye.
Eşîra Koçer her sal demsala biharê diçe deştên şahê Îranê. Şahê Îranê jineke ciwan wek temînata kirê rehîne digire.
Lê Şah vê kevneşopiya bisedan salî xera dike.
Zozanê Bavê Siltanê qala şerê Kurd Husên û artêşa Şah vedibêje.
*
Kişfên Dîrokî
Sala borî bo Bakurê Kurdistanê bû sala kişfên dîrokî.
Van keşfên han careke din girîngiya Kurdistanê di warê dîrok û çanda mirovatiyê de derxist pêş.
Hin vedîtinên herî balkêş ên ku ji hêla Arkeofîlyayê ve hatine ragihandin ev in:
* Li Garîbîn Tepeya Wanê peykerek mezin hate dîtin. Ev peyker mînakeke girîng a hunerên plastîk ên Ûrartûyan e. Tê gotin ku peyker Xweda yan jî Qralek be.
* Li Sefertepeya Rihayê 22 tasa serî hatine dîtin. Ew bi rêkûpêk hatine rêz kirin. Lêkolîneran diyar kirin ku temenê wan 12 hezar sal e.
* Li Çemka Hoyûkê (Mêrdînê) gora jineke olî hate dîtin. Jin bi heywanên kovî re hatibû definkirin. Li gorî arkeologan 12 hezar sal berê jiyan kiriye.
Marjane Strapi Légion d’honneurê Redkir
Nivîskarê pirtûka “Persepolîs” Marjane Satrapi, li Fransayê xelata herî bi prestîj a welêt red kir.
Strapi, bi rêya medyaya dijîtal daxuyaniyek da. Her wiha nameyek ji wezîra çandê ya Fransayê Rachida Dati re nivîsand.
Satrapi da zanîn ku wê xelata herî bilind a sivîl a Fransayê, “Légion d’honneur” red kiriye.
Satrapi di daxuyaniya xwe de wiha got:
“Ez naxwazim bêhurmetiyê li xelatê re bikim. Lê ez nikarim helwêsta durû ya li hember Îranê ku beşeke din a nasnameya min pêk tîne, paşguh bikim.
Dewleta Fransa rê nade muxalifên Îranî ku derbasî Fransayê bibin, lê vîzeyê didin zarokên olîgarşên Îranê. Ez vê rast nabînim.”
Marjane Satrapi piştgirî dabû serhildana “Jin Jiyan Azadî”yê jî.
