* Ev nûçe ji Ajansa Mezopotamyayê hatiye wergirtin.
AMED- Şaredariya Peyasê ya Amedê ya DEM Partiyê, li Parka 75ê “Pirtûkxaneya Berhemên Jinan” vekir.
Gelek siyasetmedar û nûnerên rêxistinên civaka sivîl jî tev li vekirina pirtûkxaneyê bûn. Di vekirina pirtûkxaneyê de jinan gelek caran dirûşma “Jin, jiyan, azadî” berz kirin.
Hevşaredara Peyasê Bêrîvan Gulşen Sîncar diyar kir ku pirtûkxane ji bo hafizeyê ye got: “Dema me ev xebat dimeşand, me xwest qadeke xweser a jinan hebe. Em hafizeya xwe mezin dikin û xurt dikin.”
Hevşaredara Bajarê Mezin a Amedê Serra Bucak jî tevlî vekirinê bû û anî ziman ku dê bi pirtûkxaneyê re heqîqet bêhtir were avakirin.
Parlamentera DEM Partiyê ya Amedê Adalet Kaya jî destnîşan kir ku avakirina pirtûkxaneya ji hêla dîrokî ve watedar e û wiha got:
“Ev der di heman demê de qada berxwedan û hafizeyê ye. Dema Nagihan Akarsel a hêja li Silêmaniyeyê xebatên vekirina pirtûkxaneya jinan dimeşand hate qetilkirin.”
Nivîskar Fatma Taşlitunç jî bi lêv kir ku divê ev pirtûkxane ji bo hemû şaredariyan bibe mînak.
Piştî axaftinan, pirtûkxane di nava stran û tilîliyan de hate vekirin.
Herî dawî jî def hate lêxistin û govend hate gerandin.
