* Ev nûçe ji Ajansa Rojnewsê hatiye wergirtin.
Romana herî dawî ya nivîskar Fewziye Salih Menmî bi navê “Nalîna Germiyaniyek Bêkes” derket.
Romanê weşanxaneya Dezgeha Serdemê çap kiriye. Menmî di romana xwe de hem dîroka Kurdistanê hem jî komkujiya Enfalê vedibêje.
Nivîskar ji Rojnewsê re axiviye û bal kişandiye ser girîngiya nivîsandina romanên li ser dîroka Kurdistanê û wiha gotiye:
“Di komkujiya Enfalê de ne tenê mirov hatin qetilkirin, nirxên çandî jî hatin tunekirin.
Nivîskarên jin divê zêdetir girîngiyê bidin nivîsandina dîroka Kurdan. Girîng e jin li ser felaketên ku hatine serê Kurdan binivîsin.
Ji ber ku mêr nikarin derdê jinan binivîsin. Ji bo vê jî girîng e jin di nivîsandina mijarên dîrokî de pêşengiyê bikin. Hêza vegotinê ya nivîskarên jin ji nivîskarên mêr pir cuda ye.
Ev jî rastiyek e ku dijminên gelê Kurd, hêzên dagirker dîroka Kurdan dinivîsînin. Divê em bêtir ji wan binivîsin.
Nivîsandina romanên dîrokî pir girîng e. Mîrateya me jî heye. Mînakên me yên wek Mestûre Erdelanî, jinên Yarsanî, Lîz Hatûna Caf û Hepsaxana Neqîb hene.”
Fewziye Salih Menmî xwediyê pirtûka “Çerdeyek Jin di Dîrokê de” ye. Ev pirtûk ji çar cîldan pêk tê û yek ji wan hatiye çapkirin. Her sê pirtûkên din jî niha li ser dizayneyê. Pirtûk behsa jinên şopa xwe li dîrokê dane dike.
Her wiha nivîskar sê romanên zarokan jî nivîsandibû. Navê wan romanan ev in: Xudnasî, Nihêniya Şikeftê û Bernameya Şemêranê.
