* Ev gotar ji rojnameya Ronahiyê (ronahi.net) hatiye wergirtin.
Esma Mistefa/Qamişlo
Di 6ê Çileya 2021an de Ajansa Nûjinha hate damezrandin. Bi derbasbûna çar salan li ser menbera ragihandina heqîqet û dengê doza jinê re, careke din li ser şopa rêhevalên ku di oxira mezinkirina şoreşa azadiyê û doza jina azad giyanên xwe fedakirine; ev soz hate nûkirin.
Derbarê salvegera 4. ya demezrandina Nûjinhayê endama ajansê Şêrîn Mihemed ji rojnameya me re axivî.
Nûjinha li ser hîmên derxistina heqîqtê avabû
Şêrîn destpêkê bal kişand ser armancên li ser avakirine û got: “Nûjinha bi mezinbûna şoreşa Rojavayê Kurdistanê re, li kêleka ajans û televezyonên jin yên ku bi vê şoreşê re hatine avakirin, di sala 2021an de li ser asta Rojhilata Navîn hate avakirin.
Bê guman bi armacên gelek mezin û bi îradeya jina azad ya ku rola sereke di şoreşê de girtiye hate avakirin. Li ser hîmên derxistina heqîqeta ku di oxira wê de gelek rêhevalên hêja canê xwe feda kirine, ajansa Nûjinha jî bi wê armancê xwe mezin kir.
Hebûna ragihandina jin di nava şoreşê de, ew berdewamkirina mîrasê wê yekê ye.
Ji destpêka avabûnê de li her derê û ji hemû qadên berxwedanê me heyanî astekê çîrok, êş, serkeftin û helwestên jinan derxistina pêş. Di heman demê de kiryarên dagirkeriyê yên ku jinê dikin hedef bi hêza çapemeniya azad derketin pêş”.
Hêza çapemeniya jin zîhniyetê hildiweşîne
Şêrînê di berdewamiya axaftina xwe de ev da diyarkirin:
“Hebûna jin di nava xebatên ragihandinê de derbeye ji hemû zîhniyetên paşverû yên ku li pêşiya vê yekê dibûn asteng.
Di demên berê de me didît ku çawa jin bi rihetî nikare di nava ragihandinê de cih bigire û ji hemû milan ve dihate êrîşkirin.
Lê niha bi mezinkirina televezyon, ajans, radio û bi giştî xebatên çapemeniya jin, em vê yekê hildiweşînin”.
“Bi dehan hevalên me şehîd ketin”
Şêrîn anî ziman ku wan li ser şopa rêhevalên xwe pêşvebiçin û wiha got:
“Dagirkerî û dijminê me bi sala ye ragihandin û kesên ku ji bo doza gelê Kurd kar dikin dike hedef. Ev ji encama tirsonekî û xeteriya ku li ser xwe dibîne ye.
Bi dehan rêhevalên me di vê xetê de Şehîd bûne. Lê ev rê nehat qutkirin. Ev xeta ku xwe disipêre têkoşîna bi dehan salan wê bi hêsanî neyê têkbirin. Li ser vê esasê em ê bi hebûna xwe, bi rihê rêhevalên xwe, bi kamîre û pênûsa xwe bibin şopdarên rastî û heqîqetê”.
