Firaz Baran
Koma Agirî ya bajarê Helebê di sala 1990î kaseta bi navê “Çemê Dîcle” derxist. Di vê kasetê de strana “Dahola Cengê” xwendin. Ev stran bo Şehîd Binevş Agal (Bêrîvan) hatibû amade kirin. Muzîka vê stranê jî Şehîd Mihemed Osman çêkiriye.
Li ser Binevş Agal Mamoste Aram Tîgran, Hozan Şemdîn û Hozan Dilgeş jî sê stranên cuda çêkirin. Van hostayên me stranên xwe bi muzîkek enerjîk pêşkêş kirin û banga têkoşînê li me kirin.
Lê muzîka strana Koma Agirî nerm e û gazî rûhê mirovan dike. Dema ku mirov li stranê guhdarî dike êşa şehîdan dihese. Strana “Dahola Cengê” malpera Hunera Pîroz parve kiriye. Hûn dikarin li ser Youtubeê guhdarî bikin. Lînkê stranê ev e:
Gotinên stranên wiha ne:
Koma Agirî – Dahola Cengê
Gotin: Tacidîn bavê Mezlûm
Muzîk: Şehîd Mihemed Osman
Stranbêj: Koma Agirî / Koral
Bi çekan xwe bişidînin
Li daholan cengê xînin
Daweta Binevşê bikin
Dûmana bi erdê xînin
Darbesta Salihê rakin
Ala PKK pêda kin
Bi sorgula bixemlînin
Li ser milê hevala kin
Bi sorgula bixemlînin
Bi mêvanê şehîda kin
Li ser bûkê bilîlînin
Li nav milet bigerînin
Bi xomîna tifingakin
Deşt û çiyan bihejînin
Bira dengê Bêrîvanê
Bigihîne jinên cîhanê
Rênakin serê xwe hildin
Pîroz bikin Kurdistanê
Em soz didin te Zozanê
Keç û xortên Kurdistanê
Em ê çeka te hilgirin
Xwe berdin nav dîlanê
Emê çeka te hilgirin
Xwe berdin nava dîlanê
Geş bikin vê berxwedanê
Bo stranê çavkanîya agahdarîyan: Cengevan bavê Cengî, Ehmed Ekaş û Seîd Bîrhat.
Navên Binevş Agal
Di stranê de sê navên Binevş Agal derbas dibe. Binevş, Bêrîvan û Zozan. Min 2006an ji bo Roj TVyê bi dayîk, bav û xwûşka hevala Bêrîvan re hevpeyvîn kiribû.
Dema ku ji dayîk dibe malbata xwe navê Binevşa Narîn lê dike.
Di sala 1984an dema ku tevlî şoreşê dibe navê Bêrîvanê radike. Sala 1988an li bajarê Cizîrê xebatên gel rêve dibe. Wê çaxê jî navê Zozanê bi kar tîne. Dema ku şehîd ket rojnameyên tirkan navê Binevş Agal wek “Suzan” nivîsandin. Wan navê Zozanê wergerandibûn Suzan.
Gotinên Stranê
Ne tenê muzîk, gotinên stranê jî balkêş in. Wek mînak dibêje:
Bira dengê Bêrîvanê
Bigihîne jinên cîhanê
Îro hemû cîhanê dengê jinên Kurdistanê bihîstiye û bi wan şad dibin. Yanê Koma Agirî ya Helebê 35 sal berê ev rastî dîtiye.
Li Rojavayê Kurdistanê xebatên çand û hunerî di sala 1986an bû xwedî sazî. Wê salê li Qamişloyê Koma Botan ava bû. Piştre li hemû bajarên sereke komên nû ava bûn. Bi navê Koma Agirî du kom derketin. Koma Agirî ya Amûdê û Koma Agirî ya Helebê.
Van koman di warê muzîk, şano û govendê de xebatên girîng kirin û gelek endamên koman şehîd ketin. Koma Agirî ya Haleb û Efrînê jî nêzî deh kaset derxistin, kar û xebatên şano û govendê kirin. Gelek endamên komê jî şehîd ketin.
Me çend roj berê li ser stranên bo Şehîd Binevş Agal gotarek parve kiribû. Hûn dikarin li ser vê lînkê gotarê bixwînin: https://kovarahuner.org/muzik/stranen-bo-binevs-agal/
Du pirtûkên li ser jiyana Şehîd Binevş Agal (Bêrîvan). Xanê Agal xwuşka hevala Bêrîvan e.