* Ev gotar ji Ajansa Rojnewsê hatiye wergirtin.
Hunermend Kerîm Kaban ku weke hunermendê evîndariyê dihate naskirin, li pey xwe gelek berhemên ku heya niha zindî mane hilişt û beriya 9 salan çû ber dilovaniya yezdan.
Ebdulkerîm Celal Mehmûd Ezîz Kaban (Kerîm Kaban) di sala 1927an de li taxa Şêxan a Silêmaniyê ji dayîk bûye.
Bala wî li ser muzîkê bûye û di temenek biçûk de derketiye ser dikê. Sala 1941ê Radyoya Silêmaniyê stran gotiye.
18 saliya xwe (1945) bûye edîtorê beşa Kurdî ya Radyoya Bexdayê. Konsera xwe ya destpêkê jî di heman salê de li Bexdayê daye.
Kaseta xwe ya yekemîn, ku ji 8 berheman pêk dihat bi navê “Rêya Evîndaran” derxistiye.
Êrîşên Rejîma Baasê
Di salên ciwantiyê de, malbata wî ji aliyê rejîmê ve sirgûnî Başûrê Iraqê hatiye kirin.
Ji ber Kurd bûyîna xwe ew jî gelek caran ji aliyê rejîma Baasê ya Iraqê ve hatiye binçavkirin.
Rêjîma Baasê di 28ê Sibata 1981ê de birayê wî Kadîr Kaban digirin û 1ê Tîrmeha 1981ê de rejîma Iraqê ji malbata re ragihandiye, ku kurê wan hatiye îdamkirin. Lê cenazeyê Kadîr Kaban nadin malbatê.
20 stranên hunermend Kaban ku bi xwe nivîsandiye û gotine hene. Ji van stranên bi navê “Yaran Wesyetim”, “Şemî Şevan” û “Teman”ê gelek stranbêjan xwendiye.
Peykerê wî çêkirin
Dema ku ew sax bû peykerê wî hatibû çêkirin. Ev peyker li Parka Azadî ya li Silêmaniyeyê ye. Şaredariya Silêmaniyeyê jî bi navê “Kerîm Kaban” parkek çêkiriye.
Kerîm Kaban endamê koma muzîkê ya Silêmaniyê û endamê Sendîkaya Hunermendên Kurd bûye.
Ji ber xebatên wî yên muzikê gelek caran ji aliyê Wezareta Çand Û Hunerê ya Iraq û Herêma Kurdistanê ve hatiye xelat kirin.
Belgefilmê bi navê ‘Temen’
Her wiha li ser jiyan û têkoşîna hunermend Kerîm Kaban, belgefîlmek bi navê “Temen” hatiye kişandin.
Kerîm Kaban çend salan ji destê nexweşiyê êşên mezin kişand.
14ê Çileya 2016ê li Nexweşxaneya Şar a bajarê Silêmanî koça dawî kir û li Goristana Seywan a Silêmaniyê hate oxir kirin.
Hezkiriyên Kerîm Kaban her sal wî bi bîr tînin.
