Xecê Elbistanî/Köln-Kovara Huner
Nivîskarê pirtûka bi navê “Aram Tîgran / Dengê Azadiyê Sembola Biratiyê” Kakşar Oremar e. Pirtûk 680 rûpel e.
Ev pirtûk Weşanên Şaredariya Bajarê Mezin a Amedê çap kiriye. Çapa yekem sala 2012an û çapa duyem jî sala 2015an derketiye. Min çapa duyem xwendiye.
Nivîskar, di pirtûkê gotinên 174 stranên bi kurdî û 10 stranên bi Ermenkî parve kiriye. Nota ya piraniya stranên kurdî jî di pirtûkê de cih digirin. Notayên stranan Evren Koç, Ahmet Tirgil, Êriş Dervişoğlu û Gursel Dayan nivîsiye.
Wek mînak em gotin û notayê strana “Derdê Welat” parve bikin (R. 92-93).
Derdê Welat
Gotin û Muzîk: Aram Dikran
Derdê welat peyde dike jan û kulek
Nav û dil ceger êşiya gelek gelek
(Koro)
Ey welato em heliyan
Ceger li erdê riziyan
Xwîn herikî û meşiyan
Ey welato em bîr nakin derba xedar
Dijmin li ser serê me bûye dîn û har
Hezar sal in ser me bûye tim ezab e
Ser serê me dike bextê zor xirab e
Ey welato bes e hezar sal em mirin
Terş û talanê me dijmin ji xwe re birin
Serboriya Malbatê
Pirtûka Mamoste bi formata mezin û bergek bi stûr hatiye çapkirin.
Kakşar Oremar di pirtûkê ne tenê jiyana Mamoste Aram Tîgran, her wiha serboriya Malbata Tîgran jî nivîsiye. Bîranînên Komkujiya 1915an bandorê li xwendevanan dike.
Ev salên dawî pirtûkên stranbêjan hêdî hêdî zêde dibin. Dema stranên hunermend bi notayên xwe tên weşandin, qîmeta pirtûkê zêde dibe. Dibe ku demêk dirêj bigirê lê ev metod pêwîst e. Ji ber ku her tim mirov nikare pirtûkan amade bike û biweşîne. Pirtûk bi PDF be jî pêwîste ev metod bê kirin.
Me nêrînên nivîskarê pirtûka Hunerkomê Firaz Baran jî girtin. Baran dibêje:
“Kakşar Oremar bi dehan sal bo rojname, kovar û telewîzyonan portre nivîsandin. Bi Mamoste re jî tekîliyê wî baş bû û pê re hevpeyvînên dûr û dirêj kiribû.
Piştre li ser jiyan û stranên Mamoste kar kir. Wêneyên Mamoste -ku îro di destê me de ne- ji hêla Kakşar Oremar ve hatine berhev kirin. Wek mînak min jî di pirtûka Hunerkomê (2007) bo beşa Mamoste wêneyên ku Kakşar berhev kiribûn bi kar anî.
Dema ku min yekem car pirtûka Mamoste Aram dît ez pir kêfxweş bûm. Ji ber ku em lêkolînan dikin û di rojname û kovaran de tenê beşek biçûk çap dikin. Lê niha bi vê pirtûkê arşîva gelê me dewlemend bû û Kakşar Oremar berhemek baş pêşkeşî me kir.”
