* Edîtorê Bultena Çandî ya Medya Haber TV Rojnameger Bayram Balci îro çar nûçe bi me re parve kirin. Nûçe li jêr in:
Bayram Balci
1- Divê Mufredata Rêveberiya Xweser Were Cîbicîkirin
HTŞ ku li Şamê rêveberiyeke nû damezrand, bi nêzîkatiyek yek alî mufredateke perwerdehiyê çêkir. Bertekên li hemberî vê yekê sist nabin.
Herî dawî bi sedan mamoste hatin cem hev û li Meydana Karama ya bajarê Suweydayê mîtîngek li dar xistin. Mamosteyan daxwaz kirin ku mufredata perwerdeyê ya ku hatiye amadekirin bê rakirin.
Civata Jinan a Zenûbiye jî ragihand ku rêveberiya HTŞê jinan li derve dihêle û gotin: “Em mufredata perwerdehiyê qebûl nekin.”
Hevseroka Desteya Perwerde û Fêrkirinê ya Bakur û Rojhilatê Sûriyê Semîra Hec Elî diyar kir ku mufredata ku hatiye diyar kirin ne li gorî civaka Sûriyê ye. Hecî Elî got:
“Civaka Sûriyê pir rengîn e. Divê hemû reng, netew û olên ku tê de hene di mufredatê de bên diyarkirin.
Lê hûn dîrokeke zindî ya jinên weke Zenûbiya ji holê radikin. Hûn kolonyalîzma Osmanî wek fetihekê dinirxînin û bi vî awayî dîrokê berovajî dikin.
Divê mufredata Rêveberiya Xweser ji bo modela perwerdeya demokratîk di Sûriyeya nû de bibe mînak.
Îro her zarokek li Bakur û Rojhilatê Sûriyê bi zimanê xwe yê zikmakî û bi çand, huner û dîroka xwe perwerdeyê dibîne. Lê ev yek dikare ji bo hemû Sûriyeyê bibe mînak.
Tenê dikarin van mînakan ji Rêveberiya Xweser bigirin û li gorî prensîbên wê kar bikin.
Banga me ew e ku hemû gelên li Sûriyeyê dijîn Elewî, Durzî, Suryanî û Ermenî bi yek dengî biaxivin û mafên xwe bixwazin.”
2- Bi Stranan li Berxwe Didin
Bi sed hezaran welatiyên ji Efrîn û Şehbayê koçî kantonên Reqa, Tebqa, Cizîr û Firatê kirin.
Yek ji wan Ekrem Begdaş e. Ew li kampa penaberan a li dibistana Hewari Bin Medîn a bajarê Reqayê dimîne. Begdaş bi stranan hêza berxwedanê dide malbatên koçber.
Begdaş, anî ziman ku jiyan hêjayî berxwedanê ye û got, ew ê rojekê teqez vegerin Efrînê:
“Dema ez stranan dibêjim, ez xwe nêzî Efrînê dibînim. Bi stranan ez û gelê herêmê bi bîr tînim ku têkoşîn didome. Êrîşên dagirkeriyê û koçberî ti carî nikarin baweriya me ya ji bo vegera Efrînê bişkînin.”
Mele Derwêş Mihemed jî di her firsendê de zarokên koçer li dora xwe kom dike. Ji zarokan re qala berxwedan û hezkirina welat dike. Mele Derwêş Mihemed dibêje:
“Her stranek, her çîrok peyama hêviyê ye. Bi vê yekê em zarokên xwe fêrî berxwedanê dikin. Em dixwazin zarokên me bizanibin ku ev rewş ne dawiya rê ye û veger ne dûr e.”
3- Li Hesekê Navenda Çanda Ermeniyan hate vekirin
Bo navendê merasîma vekirinê hat lidarxistin û nûnerên partiyên siyasî, rêxistinên jinan û meclisa leşkerî beşdarî merasîmê bûn.
Navenda Çandê bi piştgiriya Komîsyona Çandê ya Rêveberiya Xweser û Meclîsa Civakî ya Ermen hate vekirin.
Di merasîmê de Hevseroka Komîteya Çandê ya Rêveberiya Xweser Firyal Çolî axivî.
Çolî got: “Bi hemû gelê xwe yê ku ev 14 sal in di vê şoreşê de xebat kirine, bi hemû olên xwe, bi hemû bîr û baweriyên xwe îro em îsbat dikin ku em neteweya demokratîk in, projeya neteweya demokratîk in.”
Şêwirmendê Meclîsa Civakî ya Ermeniyan Îmad Teteriyan jî axivî û komkujiya Ermeniyan a sala 1915an bi bîr xist û got:
“Osmaniyan li hemberî gelê me polîtîkaya qirkirinê meşand. Di van qirkirinan de rewşenbîr û helbestvanên Ermenî kirin hedef ku çanda me tune bikin. Lê bi ser neketin.”
Di merasîmê de Koma Saya Nofa jî derket ser dikê û stranên xwe gotin.
4- Namzedên Oscarê ji ber şewata Los Angelesê nehatin ragihandin
Ji ber şewatên li Los Angelesê diyarbûna namzetên Oscarê yên 97. ji bo 25ê Çile hat taloqkirin.
Seroka Akademiyê Janet Yang di daxuyaniya xwe de ragihand ku dema dengdanê hatiye dirêjkirin û hin çalakî ji nû ve hatine destnîşankirin:
“Em hemî di bin bandora şewatêne. Akademî her tim di pîşesaziya sînemayê de hêzek yekgirtî ye û em bi biryar in ku li hember van dijwariyan bi hev re bisekinin.”
Tê payîn ku fîlmên wekî The Brutalist û Conclave di kategoriya baştirîn fîlm û derhênerê herî baş de werin hilbijartin.
Tê payîn ku merasîma xelata Oscarê di 2yê Adarê de were lidarxistin.